Курстар қазақ және орыс тілінде жүргізіледі, ұзақтығы – 72 сағат.
Еңбек министрлігінің жобасы арқылы Skills Enbek білім беру платформасында әр түрлі тегін курстарды оқуға болады, деп хабарлайды Almaty-akshamy.kz
Мысалы Data Scientist курсын деректер ғылымы саласын меңгергісі келетіндерге оқуға болады. Курс қатысушысы деректерді жинау, өңдеу және талдау дағдыларын, машиналық оқыту негіздерін игереді.
Бағдарламалауға қызығушылық танытқандарға "Жаңадан бастаушыларға арналған Python" тегін курсы бар. Бұл курс әлемдегі ең танымал Python тілінің негізгі синтаксисінен дерекқорлармен жұмыс істеуге және нысанаға бағытталған бағдарламалауға кіріспеге дейінгі тақырыптардың кең ауқымын қамтиды.
Қазақстанда кибералаяқтардың күшеюіне орай "Интернет қауіпсіздігі маманы" курсы да өзекті саналады. Мұнда интернет қауіпсіздігінің барлық негізгі аспектілері қамтылады. Курстан кейін маман түрлі саладағы кибер қауіптерді тиімді анықтауға және алдын алуға мүмкіндік алады.
"Продакт-менеджер" курсы өнімдерді басқару саласында мансабын дамытуды көздеген адамдарға арналған. Курста осы салада табысты мансап бастауға қажетті білім мен дағдылар үйретіледі.
Персоналды басқару негіздерін үйренгісі келетіндер HR менеджері курсын оқи алады. Курста HR саласындағы кәсіби жолын енді бастағандар үшін арнайы жасалған және барлық қажетті білім мен дағдылар қамтылған.
Курсты аяқтағаннан кейін қатысушы біліктілікті меңгергені туралы сертификат алады, ол электрондық еңбек биржасындағы түйіндемеде автоматты түрде көрсетіледі.