Танымал КешYou тобының экс-солисті, әнші Балауса Ерғалина Қазақстанда атом электр станциясының құрылысына арналған референдумға қатысты, деп хабарлайды aqshamnews.kz.
Әнші Қазақ спорт және туризм академиясында орналасқан № 75 сайлау учаскесіне барды. Балауса Ерғалина әрбір қазақстандықтың ел болашағына қатысты негізгі мәселелерді шешуге қатысуының маңыздылығын атап өтті.
«Әрқайсымыз өз еліміздің болашағы үшін жауапкершілікті сезінуіміз керек. Қазақстанның белсенді азаматы ретінде мен жас ұрпақтың болашағы туралы ойлаймын, сондықтан да осындай шешімдерге қатысуды өз міндетім деп санаймын», - деп ой бөлісті ол.
Естеріңізге сала кетейік, бүгін Қазақстан аумағында АЭС салу мәселесі бойынша республикалық референдум өтуде. Алматылықтар тұрғылықты жері бойынша сайлау учаскелеріне барып, сағат 20.00-ге дейін өз дауыстарын бере алады.