Қазақстанда жыл сайын 31 тамызда Шахтерлер күні аталып өтеді.
Атаулы күнге орай Энергетика министрі Ерлан Ақкенженов сала мамандарын мерекемен құттықтады, деп хабарлайды aqshamnews.kz.
"Барлық кеншілер мен көмір өнеркәсібі ардагерлерін нағыз ерлік, төзімділік пен жанқиярлық еңбектің кәсіби мерекесімен шын жүректен құттықтаймын!
Қазақстандағы көмір өнеркәсібінің тарихы оның бастауында тұрған адамдардың есімдерімен тығыз байланысты. Дәл осы ардагерлер берік негіз қалап, ұрпақтар сабақтастығын қамтамасыз етіп, еңбектің қауіпсіздік мәдениеті мен даңқты дәстүрлерін қалыптастырды.
Бүгінгі таңда да шахтерлер еліміздің дамуына шешуші үлес қосуда. Кенші еңбегі – нағыз ерлік. Жер қойнауынан пайдалы қазбаларды өндіру жоғары біліктілікті ғана емес, толықтай жанқиярлықты қажет етеді.
Елімізде 30 көмір өндіретін кәсіпорында 32 мыңнан астам адам еңбек етіп, жыл сайын 100 миллион тоннадан астам көмір өндіреді. Соның арқасында сала еліміздегі электр энергиясының 70%-ын өндіруді қамтамасыз етіп, коксохимия өндірісін толық жүктейді, сондай-ақ өнеркәсіптік кәсіпорындардың, коммуналдық-тұрмыстық сектор мен халықтың отынға деген қажеттілігін толық қанағаттандырады.
Сіздердің еңбектеріңіздің арқасында энергетикалық тұрақтылық қамтамасыз етіліп, өнеркәсіп дамып, Қазақстанның экономикалық әлеуеті нығая түсуде. Сіздер – еліміздің экономикасының тірегі әрі халықтың мақтанышысыздар.
Энергетика министрлігінің және өз атымнан сіздерге және жақындарыңызға зор денсаулық, амандық, әрбір жұмыс орнында қауіпсіздік пен жаңа жетістіктер тілеймін. Еңбектеріңіз әрдайым лайықты бағаланып, құрметке бөлене берсін! Мереке құтты болсын!" - деді министр.