Өзгерістер тестілеу орталығы тарапынан жоба ретінде ұсынылған.
Енді мамыр айында тестілеу өткізілмеуі мүмкін, деп хабарлайды Almaty-akshamy.kz
2023 жылы негізгі ҰБТ сәуір және шілде айларында өтеді деп жоспарланып отыр. Бұл туралы Ұлттық тестілеу орталығының директоры Руслан Емелбаев айтты.
Оның айтуынша, жыл сайын негізгі ҰБТ мамыр және маусым айларында өткізіліп келді, енді оған өзгеріс енгізу үшін арнайы жоба әзірленген.
«Биылғы жоспар бойынша бірінші мүмкіндікке тіркелу наурыз айында ашылады. Алғашқы тестілеуді сәуір айында өткізудің бірнеше себебі бар: біріншіден, мамыр айында мереке көп. Екіншіден, биылғы оқу жылында соңғы қоңырау 31 мамырда өтеді. Оқушылардың бар ойы соңғы қоңырауды өткізуде болады», – деді Руслан Тохтарұлы.
Ұлттық тестілеу орталығы Ғылым және жоғары білім министрлігіне ұсынған жаңа жобада жауап нұсқаларының саны өзгертілген. Яғни бір дұрыс жауабы бар тест тапсырмаларында нұсқалар саны 5-тен 4-ке дейін, бір немесе бірнеше дұрыс жауабы бар тест тапсырмаларында (үш дұрыс жауаптан көп емес) нұсқалар саны 8-ден 6-ға дейін азаяды.
Сондай-ақ ҰТО директоры Руслан Емелбаевтың айтуынша, сұрақтар саны да өзгереді. «Оқу сауаттылығы» бойынша 15 сұрақ: 5 сұрақтан 3 мәтін (200-350 сөз) беріледі, ал «Қазақстан тарихы» бойынша 20 сұрақ: бір дұрыс жауапты 10 тапсырма, мәнмәтін негізінде 10 тапсырма беріледі.