Абай алаңында екі күндік мерекелік концерт өтіп жатыр. Жаңа жыл мерекесі қарсаңында Алматы тұрғындары мен қала қонақтарына арнап «Алматы әуендері» мекемесінің шығармашылық ұжымы «Кел, Жаңа жыл!» атты кең ауқымды концерттік бағдарламасын ұсынды. Мерекелік іс-шара бүгін сағат 19:00-де басталды.
Ертең дәл осы уақытта алматылықтар тағы да мерекелік көңіл-күйді сезініп, арнайы бағдарламаны тамашалай алады. Концерттік бағдарламада елімізге танымал көрермен ықыласына бөленіп жүрген әншілер өнер көрсетті.
Атап айтқанда Бақтияр Тайлақбаев, Өктем Алтаев, Тахмина Әшімбекова, Жұбаныш Жексенұлы, Марта Төлепберген, Асхат Тарғын, Бейбітгүл Нұрымхожина, Димаш Дәулетов, Абик Жексен, Ғарифа Игісінова, Ерік Төленов және DARO сынды белгілі өнерпаздар ән шырқады. Өнерпаздар таңдаулы туындыларын, сондай-ақ жаңа жылдық көңіл-күй сыйлайтын әуендерді ұсынды. 
Алаңға жиналған қала тұрғындары мен қонақтары мерекеге орай безендірілген сахна, сапалы дыбыс пен жарық, кәсіби орындаушылардың өнері көрермендерге ұмытылмас әсер сыйлады.
- Мен Абай алаңына жақын тұрамын. Бізде алаң қалай безендірілгені ұнады. Әрі концерттен керемет әсер алдық. Нағыз мерекені сезініп жатырмыз. Бәріне Жаңа жыл құтты болсын, - деді Айым Ахметова.