Елімізде йод, корвалол, меновазин, бриллиант жасылы мен валериана сығындысы қымбаттауы мүмкін.
Өйткені жаңа жылдан бастап осы дәрі-дәрмектің құрамына кіретін этил спиртіне акциз салығы салынады. Бұл туралы аlmaty-akshamy.kz хабарлайды КТК арнасына сілтеме жасап.
"Атамекен" ҰКП Медициналық қызмет департаментінің басқарушы директоры Назгүл Қабдырахманованың болжауынша, қазір тиын-тебен тұратын бұл препараттардың бағасы 30, тіпті 100 пайызға өседі.
25 миллилитр құтысы 100-200 теңге аралығында сатылатын йод, сол аралықта тұратын корвалол тамшылары енді екі есе қымбаттап шыға келуі мүмкін. Өйткені медициналық таза спирттің литріне салынатын акциз көлемі 600 теңге, спирт тұнбасына 2 жарым мың теңге. Ал біздің нарықта Ресей мен Беларусьта өндірілген дәл осы дәрілер әлдеқайда арзанырақ. Өйткені бұл мемлекеттерде нақты осы препараттарға акциз салығы жоқ екен. Сондықтан тұтынушы әлбетте бәсекелестер шығарған қолжетімдісін таңдайтынын айтады. Сондықтан отандық фармацевттер өндіріс көлемін азайтып, жұмыс орындарын да қысқартуына тура келеді дейді.
"Дәрілік заттар мен медициналық өнімдерді өндіруде қолданылатын этил спиртіне акциз салынады. Акциз салу, құрамында алкоголь пайдаланылатын өнім бағасының қатты өсуіне әкеп соғады. Бүгінде осындай 130-ға жуық тауар бар. Отандық өнімдер өндірісте қолданылатын алкоголь мөлшеріне байланысты 30-дан 100 пайызға дейін қымбаттауы мүмкін", - дейді Назгүл Қабдырахманова.