Кәсібін домалатып, күні-түні еңбек еткен кәсіпкерлер қаражаттан қысылып жатқан жоқ. Ерінбей көрші елден түрлі тауар тасып, сауда көркін қыздырып жатқандары қаншама? Ендеше бүгінгі көрші Қытай елімен арадағы визасыз режимнің тиімділігі бар ма? Жеке кәсіпкер Ерзат Мұсираттың пікірін білген едік.
- Қытай мен Қазақстан арасында визасыз режимнің енгізілуін өз басым жақсыға жоримын. Оның себебін айтар болсам, ең алдымен, біз мынаны ескеруіміз керек. Әлемдегі жағдайға байланысты Қытай тауарының Еуропаға тасымалдауына үлкен кедергі болып тұр. Бұл кедергіні Қытай билігі тек Ресей федерациясын айналып өтіп, Қазақстан территориясы арқылы Каспий теңізіне шығып, ары қарай Бакумен ұлы құрлыққа жету жоспарларын орындамақшы. Бұл біз үшін транзиттік әлеуетті пайдаланудағы үлкен мүмкіндік. Ал тауар тасымалының жүк көліктері арқылы іске асатынын ескерсек, шекарадан жүк көліктерінің кедергісіз өтуіне жүргізушілердің де визасыз өтуі қатты ықпал етеді.
(Сурет: ашық дереккөз)
Ал екінші себеп, ел азаматтары көрші елге визасыз өтетін болса кәсіп бастамақшы болған азаматтарымыз үшін Қытай ашық кеңестікке айналары хақ. Қажет кезде әлемнің ең ірі өндіруші кәсіпорындарына бара алады. Сонымен қатар Қазақстанға инвестиция тартуға үлкен мүмкіндік.
Ал халықтың үрейіне келер болсақ, оған еш негіз жоқ деп ойлаймын. Визасыз келген азамат елде ұзақ тұруға, тұру мақсатын өзгертуге, тұрақты тіркеуге тұруға мүлде рұқсат жоқ. Мұның барлығы тек визамен келген жағдайда ғана болады. 30 күн мерзім аяқталғанда елден шығуға міндетті. Ал екі ел арасындағы келісілген уақыттан асып кетсе, айыппұл мен елден қуу сынды ауыр шаралар қарастырылған, - дейді кәсіпкер.