Ұлттық қауіпсіздік комитеті (ҰҚК) хабарлауынша Кәрім Мәсімов 2024 жылдың наурыз айында Қазақстан Республикасының Президентіне кешірім жасау туралы өтініш жіберген, деп хабарлайды almaty-akshamy.kz
ҰҚК мәлімдеуінше, Мәсімов қазіргі таңда Астанадағы ҰҚК тергеу изоляторында қамауда отыр. Комитеттің ресми хабарламасында:
"2024 жылдың наурыз айында ол осы мекемеден Қазақстан Республикасы Президентінің атына рақымшылық алу жөнінде өтініш жолдаған," - делінген.
Кәрім Мәсімовке қатысты қылмыстық істер 218-баптың 3-бөлігінің 3-тармағы («Қылмыстық жолмен алынған ақшаны және өзге де мүлікті заңдастыру») және 366-баптың 4-бөлігі («Аса ірі көлемде пара алу») бойынша сотқа дейінгі тергеу жалғасуда.
2023 жылдың сәуір айында сот Ұлттық қауіпсіздік комитетінің бұрынғы төрағасы Кәрім Мәсімов пен оның орынбасарларына қатысты үкім шығарды. Мәсімов мемлекетке опасыздық жасады, билікті басып алуды насихаттады және билікті асыра пайдаланды деп танылды. Сот үкімі бойынша Мәсімов мүлкі тәркіленіп, 18 жылға бас бостандығынан айырылды және өмір бойына мемлекеттік қызметте лауазымдарды атқару құқығынан айырылды.
Оның орынбасарлары Садықұлов 16 жылға, Ерғожин және Осипов 15 және 3 жылға бас бостандығынан айырылды. Төртеуі де арнайы атақтары мен мемлекеттік наградаларынан айырылды. Мемлекетке 10 миллиард теңге және 24 миллион доллар өндірілді.
Естеріңізге сала кетейік, 2022 жылдың 6 қаңтарында Кәрім Мәсімов мемлекетке опасыздық жасады деген күдікпен ұсталған болатын. Қаңтар айының соңында ҰҚК баспасөз қызметі Мәсімов пен оның орынбасарларының ісі құпия болып, сот оларды қамауға алуға санкция бергенін хабарлады. 10 наурызда Мәсімовтен тәркіленген миллиондар, зәулім үйлер мен қымбат көліктер туралы ақпарат жарияланды.