Елімізде көктемнен бері «Таза Қазақстан» жалпыұлттық экологиялық акциясы ұйымдастырылып, онда қала аумағын абаттандыру, көгалдандыру, көшелерді тазарту секілді тазалық шаралары өткені баршаңызға мәлім.
Мемлекет басшысы Қасым-Жомарт Тоқаевтың тапсырмасы аясында қолға алынған игі бастаманы алматылықтар да қуана қабылдады. Экологиялық акцияда қала тұрғындары мен еріктілері өзендерді, саябақтарды, көше бойларын және табиғи аумақтарды тазарту жұмыстарына белсене қатысып, қала экологиясын жақсартуға үлес қосуда.
– Алматыда көктемнен бастап жаз бойы экологиялық түрлі іс-шаралар өтті. Өз басым солардың бірнешеуіне ерікті ретінде қатыстым. Алматы – шетелдік қонақтар қызыға қарайтын әсем қала ғой. Сондықтан біз өзіміз тұратын жұмақ мекенді таза ұстауға міндеттіміз! Әркімге өзі өмір сүретін, тұратын жері қымбат! Мен үшін Алматыға жететін жер жоқ. Алматы жыл өткен сайын жасарып, күн өткен сайын құлпырып келеді. Жазда тіпті керемет! Жасыл желегі мен қызыл-жасыл гүлдері жайқалғанда, Алматы ажарлана түседі. Әрине, мұның барлығы тынымсыз еңбекті, үздіксіз тазалықты талап етеді. Біз таңертең жұмысқа келе жатқанда сары түсті күртеше киіп, қолдарына сыпыртқы, күрек ұстаған тазалықшыларды күнде көреміз. Бірақ, біз олардың жұмысын әлі де бағалай алмай келеміз. Шындап келгенде, Алматымыздың тап-таза болып тұрғаны таңмен таласа оянып, іске кірісетін сол жандардың еңбегі! – дейді Алмалы ауданының тұрғыны Нұргүл Қойшыбекова.