Қазақстанда соңғы 5 жылда пәтер тонау қылмысы азайып келеді. Бұл туралы ҚР ІІМ Криминалды полиция департаментінің аса маңызды істер жөніндегі аға жедел уәкілі Әсет Жүкенов айтып берді, деп хабарлайды Almaty-akshamy.kz.
«Ұйымдастыру шаралары мен мақсатты жұмыс нәтижесінде жыл басынан бері 1,5 мыңнан астам пәтер ұрысы ұсталды. Оның ішінде 100-ге жуық «гастролер» ұрылар, яғни түрлі қалаларда ұрлық жасайтындар және 175 қылмыстық топ ұсталды», - деді Әсет Жүкенов ҚР ІІМ апталық брифингінде.
Мәселен, жыл басында Алматыда Шығыс Қазақстан облысының 3 тұрғыны, яғни гастролер-пәтер ұрылары ұсталды. Олар пластикалық терезелер арқылы үйлерге кіріп, 5 рет ұрлық жасаған. Жалпы, келтірілген залал 9 млн теңгеден асты, олардың барлығы 3 жылға бас бостандығынан айырылды.
Биылғы жаз маусымында жедел-іздестіру іс-шаралары арқылы Ақмола облысының Щучинск қаласының бұрын сотталған тұрғыны ұсталды. Ол осы қалада тұрғындардың жоқтығын пайдаланып, үш пәтерді тонаған. Залал 3 млн теңге болды.
Жалпы, қабылданған шаралар нәтижесінде соңғы 5 жылда пәтер ұрлығы жыл сайын орта есеппен 34,4%-ға төмендеді. 2018 жылы 34 мыңнан астам қылмыс тіркелсе, 2022 жылы 11 мыңнан аспаған. Биыл да 16,1% немесе 1 100 қылмысқа төмендеу байқалады.
«Бірақ, жеке мүлікті ұрлаған адамдар пәтерге кіру дағдылары мен тәсілдерін үнемі жетілдіріп отыратынын атап өткен жөн. Олар заманауи техниканы, ұялы байланысты пайдаланады, есіктер мен құлыптарды ашуға арнайы бейімделген құралдарды сатып алады және жасайды. Бұл ретте, негізінен пәтер ұрлығы күндізгі уақытта, атап айтқанда барлығы жұмыста немесе оқуда болған кезеңде жасалады», - деді спикер.