Көлік вице-министрі Сатжан Аблалиев Кавказ және Орталық Азия құрылыс форумының ашылуында Қазақстан жолдарын бағалау бағдарламасы — KazRAP-тың іске қосылғанын жариялады.
Бұл бастама жол қозғалысы қауіпсіздігін қамтамасыз ету мен автожолдардың жағдайын жақсартуға бағытталған жүйелі тәсілді көздейді, деп хабарлайды aqshamnews.kz.
KazRAP - жол инфрақұрылымының қауіпсіздігін арттыру бойынша ұлттық жүйенің негізгі элементіне айналады. Бағдарлама жолдардың жай-күйін халықаралық әдістемеге сүйене тәуелсіз бағалауды, жол-көлік оқиғаларын алдын-алуға, инвестициялардың тиімділігіне мониторинг жүргізуді және жол қауіпсіздігі саласындағы стратегиялық жоспарлауды көздейді.
Бағдарлама Халықаралық жолдарды бағалау бағдарламасымен (iRAP) бірлесе жүзеге асырылады.
Келісімге КАЗНИИБДД директоры Арыстан Масанов пен iRAP-тың атқарушы бас директоры Грег Смит қол қойды.
Сонымен қатар, Форумның ашылуында Вице-министр ведомствоның қазіргі және жоспарланып отырған бастамаларына да тоқталып, халықаралық көлік дәліздерін дамытуға, жол инфрақұрылымын жаңғыртуға, цифрлық технологияларды енгізуге және саланың инвестициялық тартымдылығын арттыруға баса мән берілетінін атап өтті.
Форумға мемлекеттік органдардың, жеке сектордың, инженерлік қауымдастық пен заң саласының өкілдерінен тұратын 20 елден 120 қатысушы жиналды.
Екі күн ішінде 9 тақырыптық панельдік сессия өтті. Олар ірі инфрақұрылымдық жобаларды іске асыру, халықаралық қаржы институттарының қатысуы, жол қауіпсіздігі инженериясы, FIDIC стандарттары бойынша келісімшарттарды дайындау, дауларды шешу кеңестерінің қызметі, халықаралық арбитраж және құрылыс саласындағы кәсіби әлеуетті дамыту мәселелерін қамтиды.