Республикалық немесе аймақтық жол болсын, еліміздегі жолдың бәрі сапалы болуы керек.
Мемлекет басшысы әзірге жағдай мәз еместігін баса айтты. Қазір Президент Қасым-Жомарт Тоқаевтың қатысумен Үкіметтің жаңартылған құрамымен кеңейтілген отырыс өтіп жатыр, деп хабарлайды Almaty-alshamy.kz.
Онда Президент республикалық маңызы бар жолдарды салуға отандық кәсіпорындарды тарту керектігін айтты.
«Келесі – автожол мәселесі. Еліміз үшін айрықша маңызды «Астана-Балқаш-Алматы» тас жолы әлі күнге дейін жөнделіп біткен жоқ. Құрылыс 2017 жылдан бері жүріп жатыр. Республикалық маңызы бар «Атырау-Астрахань», «Ақтөбе-Қандыағаш», «Талдықорған-Өскемен» жолдарының жөнделіп жатқанына 5 жылдан асты. Биыл осы жұмыстар біржола аяқталуға тиіс», - деді Қасым-Жомарт Тоқаев.
Президент осы орайда бірнеше мәселені ескеру қажеттігін айрықша айтты.
«Қалыптасқан тәжірибеге қарасақ, республикалық маңызы бар жолдардың тендерін көп жағдайда тек шетел компаниялары ұтып алады. Мұндай жобаларға қолынан іс келетін, тиісті техникамен жабдықталған өз кәсіпорындарымызды тарту керек. Сонымен қатар, жол құрылысына қажетті техниканы елімізде шығару жолдарын дамытып, өзіміздің дайын өнімді пайдалану керек. Жалпы, жол мәселесіне келгенде бір ғана мақсат болуға тиіс. Республикалық немесе аймақтық жол болсын, еліміздегі жолдың бәрі сапалы болуы керек. Әзірге жағдай мәз емес»», - деді Мемлекет басшысы.