Қазақстанның Жоғарғы соты мектептерде орамал тағуға тыйым салу қыздардың білім алу құқығын шектейді деп шешті. Бұл туралы белгілі заңгер Жаслан Айтмағанбетов Instagram парақшасында жазды, деп хабарлайды aqshamnews.kz.
Заңгер Батыс Қазақстан облысындағы бір мектепте орамал таққан оқушыны сабаққа қатыстырудан бас тартқан жағдайды атап өтті.
«Қазақстан Республикасының Жоғарғы Соты өз шешімінде облыстық соттың шешімін бұзып, мұндай тыйым оқушының білім алу құқығын бұзады деп таныды», - деп жазды ол.
Сонымен қатар, Жаслан Айтмағанбетов мұндай шектеулердің Қазақстанның басқа соттары тарапынан да заңсыз деп танылғанын қосты.
Айта кетейік, Қазақстанда мектеп формасына қойылатын талаптарға сәйкес, оқушылар мектеп әкімшілігі бекіткен бірыңғай форманы сақтауға міндетті. Алайда, кейбір жағдайларда діни сенімдерге байланысты орамал тағу мәселесі даулы болып келеді. Жоғарғы соттың бұл шешімі оқушылардың білім алу құқығын қорғауға бағытталған маңызды қадам ретінде бағалануда.