Жетісу облысында адам өлімімен аяқталған жол апаты әлеуметтік желіге тараған видеоға түсіп қалды, деп хабарлайды Aqshamnews.kz тілшісі. Қайғылы оқиға 31 қаңтарда Ескелді ауданындағы Қарабұлақ ауылында (Мелькомбинат аумағы) болған.
Кадрлардан бір автокөліктің басып озу кезінде өзге көлікке соғылып, соққы салдарынан қарсы бағытқа шығып кетіп, тағы екі көлікпен соқтығысқаны көрінеді. Оқиға салдарынан бес адам аудандық ауруханаға жеткізіліп, медициналық көмек көрсетілген. Кейін алған жарақаттарынан Nissan көлігінің жүргізушісі көз жұмғаны белгілі болды.
Жетісу облысы Полиция департаментінің мәліметінше, Талдықорған – Текелі тасжолында төрт автокөлік қатысқан жол-көлік оқиғасы бойынша сотқа дейінгі тергеу басталған. Mercedes жүргізушісі қамауға алынды.
Полиция жүргізушілерді жол ережесін қатаң сақтауға, жылдамдықты асырмауға, арақашықтықты ұстанып, жолда барынша мұқият болуға шақырды.