Алматы қаласының Жетісу ауданында республикалық «Таза Қазақстан» акциясын қолдау мақсатында 1000-нан астам аудан тұрғыны сенбілікке шықты.
Ауқымды экологиялық шараға аудан тұрғындары, мемлекеттік және жеке мекемелер, қоғамдық ұйымдар, жастар мен қарттар қауымы белсене атсалысты.
Іс-шара барысында 25 арнайы техника күшімен Серіков көшесі (Ангарская көшесінен Қазыбаев көшесіне дейін), Абылай хан даңғылы, Ақпаев пен Яблочков көшелерінің бойындағы аумақтар тазартылды. Тұрғындар өз күштерімен аула маңайларын ретке келтірді. Нәтижесінде 65 текше метрден астам тұрмыстық қалдық шығарылды.
Сондай-ақ, Сейфуллин мен Жансүгіров көшелерінің қиылысында аудан әкімі мен прокурорының қатысуымен 100 дана Райка сұрпындағы алма ағашы, 10 балтық үйеңкісі және 25 қызғалдақ ағашы отырғызылды.
Алдағы уақытта аудан аумағында 1000-нан астам жапырақты ағаш көшеттерін отырғызу жоспарлануда.