Әмір 6 жасына дейін тек қана қазақша сөйлеген.
Әмір Кәрім орыс-ағылшын тілдері оқытылатын мектепте білім алған, ал басқа тілдерді қарым-қатынас барысында меңгерген, деп хабарлайды aqshamnews.kz Otyrar.kz-ке сілтеме жасап.
4 тілді жарты жылда меңгерген, 7 тілде еркін сөйлейтін шымкенттік полиглот бұл әлі мүмкіндігінің шегі емес екенін және жақын арада өз рекордын жаңартатынын айтады. Эмир 6 жасқа дейін тек қазақша сөйлеген. Мектепте орыс, ағылшын тілдерін жетік меңгерген. Бүгінде полиглот испан, корей, француз және латын тілдерінде сөйлей алады. Ол бұл тілдерді жарты жылдың ішінде игерген.
"Бірінші сыныпта жүргенде-ақ ата-анам тілдердің мен үшін оңай екенін түсінді. Сөйтіп мен көптеген тілді үйрене бастадым. Испан тілін 5-6 айда, француз тілін 7 айда үйрендім және Испанияға сапарымның алдында қалған тілдерді де меңгердім. Оларды зерттеуге көбірек уақыт қажет болды", - дейді полиглот.
Оқуда ғана емес, спортта да жетістікке жетіп жүрген Әмір 10 жасынан бастап футбол ойнайды. Тіпті шетелде, Испанияда жүргенде ол "Торревьеха" футбол клубында жаттыққан. Қазір Әмір "Ордабасы" жастар академиясының негізгі ойыншысы. Ол тіл білудің әкелетін басты пайдасы – саяхаттағы шектеулерді алып тастау дейді.
"Испанияда біз чемпион атандық. Одан кейін былтыр шымкенттік "Ордабасы" командасымен "Арман кубогын" жеңіп алдық. Қазір жаңа Ордабасы лигасымен жаңа жобамен екінші орындамыз, алдымызда "Қайрат". Біз чемпиондық атаққа үміттенеміз. Осы жылы командамен Түркияға барғанымда шет тілін білуім тағы да көмектесті", - дейді Әмір.
Бірнеше тілді еркін меңгерген Әмір университетте менеджмент саласы бойынша оқиды. Көпбалалы отбасында өскен Әмірдің қарындастары да тіл үйренуге тырысып жүр, олар қазірдің өзінде үш-төрт тілде сөйлейді.