Биыл Ұлы Жеңістің 80 жылдығы аталып өтеді. Бұл айтулы мереке Қазақстанның әрбір азаматы үшін ерекше маңызға ие. Өйткені сұрапыл соғыстың зардабын тартпаған отбасы кемде-кем. Мемлекет басшысы атап өткендей:
"Соғыста қаза тапқандарды ұмытпай, қаһарман ерлеріміздің рухына тағзым ету, ел ішінде бейбітшілік пен тыныштықты сақтау – баршаға ортақ парызымыз."
Осыған орай, М.Жұмабаев атындағы №137 мектепте жастарға патриоттық тәрбие беру мақсатында «Жеңіс жолындағы ерлік – тарихтан болашаққа» атты қалалық іс-шара ұйымдастырылды.
Іс-шараны өткізуге мектебіміздің мұғалімдері: Арынова Света Кеңесбекқызы, Нұркеева Сауле Құсманқызы, Ерсеркенова Салтанат Ахметжанқызы, Қуатова Гүлнар Қабылқызы, Жолымова Света Камаловна, Қасылкәрімова Раушан Маралбекқызы, Дуамбекова Аяла Қанатқызы, Бауыржан Жалғас, Можанова Айзат Құттыбайқызы ұйытқы болды.
Іс-шараның негізгі мақсаты – майдан даласында от кешкен батырларымыздың ерлігін жас ұрпаққа насихаттау, олардың жеңіс жолындағы қажырлы күресін еске алу және жастарды отансүйгіштікке тәрбиелеу.
Кеш қонақтары адамзат тарихындағы ең зұлмат соғыстың зардаптары туралы әңгімелеп, жеңісті жақындатқан майдангерлердің естеліктерімен бөлісті. Сондай-ақ мектеп оқушылары Ұлы Жеңістің 80 жылдығына арналған өнерлерін паш етті. Кеш барысында патриоттық әндер шырқалып, би қойылымдары орындалды, жыр шумақтары оқылып, ұлттық күйлер орындалды.
Сонымен қатар, мектеп мұғалімдері Көлбаев Мейрам мен Карикен Гүлнафистің ұйымдастыруымен Жеңістің 80 жылдығына арналған көрме ұйымдастырылды. Бұл көрме оқушылардың мәдени және шығармашылық қабілеттерін дамытуға, бейнелеу өнерінің терең сырларын тануға мүмкіндік берді.
Бүгінде бейбіт аспан астында өмір сүріп келе жатқанымызға 80 жыл толып отыр. Алайда майданда шайқасқан ардагерлер қатары жыл өткен сайын сиреп барады. Біздің басты міндетіміз – олардың есімдерін мәңгі есте сақтау, құрмет көрсету, сондай-ақ өскелең ұрпаққа отансүйгіштік пен бірліктің құндылығын дәріптеу.
Алматы қаласы, Жетісу ауданы
М.Жұмабаев атындағы №137 мектеп директорының орынбасары
Г. А. Делегеева