Непалда әлеуметтік желілерді бұғаттау жаппай қарсылыққа ұласып, қақтығыстар кезінде кемі 22 адам қаза тауып, мыңнан аса адам жараланды деген дерек тарады. Билік бұғаттау әрекеттерін тоқтатты және премьер-министр Шарма Оли отставкаға өтініш берді. Дегенмен наразылықтар комендант сағатқа қарамастан жалғасып жатыр. Бұл туралы Реутер агенттігі хабарлады. Дәл қазір Непалда не болып жатыр Аqshamnews.kz тілшісінің хронологиялық материалынан біліңіз.
Бәрі неден басталды?
Үкімет Facebook, Instagram, YouTube, X (Twitter), WhatsApp, Reddit, LinkedIn секілді платформаларды "тіркеу талаптарын орындамады" деп шектеп тастады. Бұл шешімді халық сөз бостандығын шектеу ретінде қабылдап, жастар көшеге наразылыққа шықты.
сурет: Adnan Abidi / Reuters
8 қыркүйекте қақтығыстар ушығып, алғашқы құрбандар тіркелді
Наразылық білдірушілер шеруге "Z ұрпағы наразылықтары" деп атау беріп, елде жаппай тәртіпсіздіктер басталды. Бұндай атау көпшілігінің жасына байланысты қойылған. Ашулы топ тіпті қаржы министрін шешіндіріп, өзеннен жалаңаш өткізген. Онымен қоса үкіметінің кеңсесі орналасқан 100 жылдан аса тарихы бар Катманду қаласындағы Сингха Дурбар сарайын өртеп жіберді.
Катманду мен өзге қалаларда полиция парламентке басып кіруге талпынған топты көз жасартатын газбен және резеңке оқпен таратты. Наразылар парламент алдындағы қоршауларды бұзып, бірнеше саясаткердің резиденциясына от қойды. Сол күні қаза тапқандар туралы алғашқы ақпараттар шықты. Нәтижесінде екі күн ішінде жаппай тәртіпсіздіктен 22 адам қаза тауып, 400-ден астам адам жараланды.
сурет: Reuters
Билік шегінді, премьер отставкаға кетті
Байланыс және цифрлық технологиялар министрі "Әлеуметтік желілерді бұғаттауды тоқтаттық, олар жұмыс істеп тұр" деп хабарлады. Сол күні премьер-министр Шарма Оли қызметінен кетуге өтініш берді. Бірақ бұл шешім де толқуды баса алмады. Шерушілер жүйелік реформаларды және биліктің есеп беруін талап етіп жатыр.
Қазіргі ахуал қандай?
Катмандуда коммендант сағаты енгізілді. Соған қарамастан, жастардың бастамасымен өткен митингілер толастамай тұр: парламент пен шенеуніктер резиденциялары маңында ұрандар айтылып, қауіпсіздік шаралары күшейтілді. Билік пен наразылық өкілдері диалогқа келмейінше, ахуалдың тұрақталуы екіталай деген болжам айтылып жатыр.
сурет: Reuters