Жеке сот орындаушыларының қызметіне төленетін ақы мөлшері бекітілді, деп хабарлайды Almaty-akshamy.kz ҚазАқпарат-қа сілтеме жасап.
Әділет министрі Азамат Есқараев тиісті бұйрыққа қол қойды. Құжатта жазылғандай, енді жеке сот орындаушылардың қызметіне мына мөлшерде ақы төленеді:
мүліктік (ақшалай) сипаттағы атқарушылық құжаттар үшін мынадай сомалар бойынша:
- 60 АЕК-ке дейін болса – өндіріп алу сомасының 25 пайызы мөлшерінде;
- 60 АЕК-тен 300 АЕК-ке дейін болса – өндіріп алу сомасының 20 пайызы мөлшерінде;
- 300 АЕК-тен 1000 АЕК-ке дейін болса – өндіріп алу сомасының 15 пайызы мөлшерінде;
- 1 000 АЕК-тен 5 000 АЕК-ке дейін болса – өндіріп алу сомасының 10 пайызы мөлшерінде;
- 5 000 АЕК-тен 10 000 АЕК-ке дейін болса – өндіріп алу сомасының 8 пайызы мөлшерінде;
- 10 000 АЕК-тен 20 000 АЕК-ке дейін болса – өндіріп алу сомасының 5 пайызы мөлшерінде;
- 20 000 АЕК-тен жоғары болса – өндіріп алу сомасының 3 пайызы мөлшерінде.
мүліктік емес (ақшалай емес) сипаттағы атқарушылық құжаттар үшін:
- шығару және үйге орналастыру, борышкерді белгілі бір әрекеттер жасауға немесе оларды жасаудан тартынуға міндеттеу туралы атқарушылық құжаттар бойынша – жеке тұлғалардан 50 АЕК, заңды тұлғалардан 100 АЕК;
- талап қоюды қамтамасыз ету, мүлікті тыйым салудан босату және өзге атқарушылық құжаттар бойынша – жеке тұлғалардан 10 АЕК, заңды тұлғалардан 20 АЕК;
- баламен қарым-қатынас жасау тәртібі туралы – жеке тұлғалардан үш ай сайын 20 АЕК мөлшерінде.
мерзімді төлемдерді өндіріп алу туралы атқарушылық құжаттар үшін:
- алименттерді өндіріп алу және жарақаттанудан немесе денсаулықты өзге де зақымдаудан келтірілген зиянды өтеу туралы, өндіріп алу сомасының 1 АЕК мөлшерінде.
Бұйрық 10 шілдеден бастап күшіне енеді.