Вашингтонда жерленген қазақтың жазушысы Мұхтар Мағауиннің қабіріне арнайы зиярат жасалып, туған жерінен топырақ жеткізілді, – деп хабарлайды Аqshamnews.kz тілшісі Qaz365.kz-ке сілтеме жасап.
Жазушының ұлы Едіге Мағауин Абай облысы Шұбартау ауданындағы Босаға өңірінен әкелінген топырақ пен жусанды әкесі жатқан қабірге салды. Бұл – жазушыны ата қонысымен символдық түрде байланыстыруды көздейтін қазақы дәстүр.
Зиярат рәсіміне Вашингтондағы Kazakh American Association мүшелері қатысып, Мағауиннің рухына тағзым етті.
Еске салайық, 2025 жылғы қаңтарда Мұхтар Мағауин 85 жасқа қараған шағында қайтыс болды.
Айта кетейік, Мұхтар Мағауин – тарихи романдары мен зерттеулері арқылы ұлттық сананың жаңғыруына үлес қосқан қаламгер. Ол бүкіл ғұмырын қазақ тарихын түгендеуге арнап, артына 27 том еңбек қалдырды.