Оқу-ағарту министрлігі мен Freedom Holding Corp. білім беру ресурстарын дамыту бойынша ынтымақтастық қарым-қатынас орнату мақсатында меморандумға қол қойды, деп хабарлайды ведомствоның баспасөз қызметі.
Бұл құжат Мемлекет басшысының мектепке дейінгі, орта, техникалық және кәсіби білім беру ұйымдарының қажетті функционалдары енгізілген бірыңғай онлайн білім беру платформасын әзірлеу туралы тапсырмасы аясында жүзеге асырылуда.
Оқу-ағарту вице-министрі Арай Оразова атап өткендей, қазіргі уақытта білім берудің барлық деңгейінде процестерді автоматтандыруға мүмкіндік беретін бірыңғай цифрлық экожүйе құру қажеттілігі байқалады. Бұл мақсатқа жету үшін министрлік Freedom Holding Corp.-тің қолдауымен білім беру өнімдерінің маркетплейсін әзірлеу жұмыстарын жүргізуде. Мұнда жасанды интеллект құралдары арқылы әрбір баланың талантын ашуға арналған мүмкіндіктер ұсынылады. Бұл балаларға ерте жастан бастап өз таланттарын дамытып, мамандық таңдауға көмектеседі, еліміздің адами капиталын дамытуға және мұғалім, бала мен ата-ана арасындағы коммуникацияны жақсартуға мүмкіндік береді.
Тараптар ұлттық бірыңғай білім беру платформасы арқылы әрбір білім алушы үшін онлайн оқуды қолжетімді және сапалы етудің маңыздылығын талқылады. Сонымен қатар, білім беру ұйымдарында платформаны ілгерілету мен дамыту, бірлескен жобаларды жүзеге асыру, стейкхолдерлермен семинарлар мен конференциялар өткізу туралы келісімге келді.
Бұл ынтымақтастық білім беру саласындағы процестерді цифрландыру арқылы оқушылардың білім алу сапасын арттыруға, олардың таланттарын ерте жастан дамытуға және білім беру ұйымдарының жұмысын тиімді етуге бағытталған.