Алматыда балалар-жасөспірімдер спорт мектептерінің тәрбиеленушілері мен олардың жаттықтырушылары «Алматы – біздің ортақ үйіміз» қалалық бастамасы және республикалық «Таза Қазақстан» бағдарламасы аясында өтіп жатқан «Жарқын күз» күзгі науқанын қолдады, деп хабарлайды aqshamnews.kz
Жас спортшылар мен олардың тәлімгерлері челленджге қатысты, оқу орындарының аумағын тазалап, қоқыс жинады. Олар әр адамның біздің ортақ үйіміз – Алматының тазалығы мен сұлулығын сақтау жолында үлес қосуының маңыздылығын атап өтті.
«Алматы – біздің ортақ үйіміз, оны таза әрі әдемі ету үшін ең алдымен өзімізден бастауымыз керек», – деді спортшылар.
Сондай-ақ, челлендж қатысушылары қала тұрғындарын сүйікті қаламызды күтіп-баптауға, экологиялық науқанға үлесн қосуға шақырды.
«Барлық ниет білдірушілер көшеге шығып, қаламызды көркейтуге, ағаш отырғызуға қатыса алады. Алматыны бірге таза әрі гүлденген қалаға айналдырайық», – деді ОРМБЖСМ №2 тәрбиеленушісі, Азия чемпионатының жүлдегері Максим Балабин.
Естеріңізге сала кетейік, 18-24 қазан аралығында Алматыда қала көшелерінде, аулаларда, қоғамдық орындарында және жол бойындағы инфрақұрылымда ағаштарды санитарлық мақсатта кесу, түскен жапырақтар мен қоқыстарды жинау бойынша ауқымды жұмыстар қолға алынған.