Алматы қаласындағы Қазақстан Республикасының Ұлттық ұланы 3650 әскери бөлімінде жас сарбаздардың салтанатты түрде ант қабылдау рәсімі өтті.
Отан үшін отқа түсер азаматтарымыздың өміріндегі жауапты қадам жасау іс-шарасына «Оңтүстік» өңірлік қолбасшылығы қолбасшысының техника және қару-жарақ жөніндегі орынбасары полковник Игорь Поповский және бөлімнің әскери қызметшілері, сондай-ақ сарбаздардың ата-аналары мен туған-туыстары қатысты.
Жетісу облысынан шақырылған 40-қа жуық жауынгер Қазақстан халқына адал болуға, оның заңдары мен ұлттық құндылықтарын қастерлеп сақтауға ант берді.
– Ұлымның Отан алдындағы әскери ант қабылдау іс-шарасын көзімізбен көріп, неге қуанбасқа?! Қарап тұрсам, баламның жағдайы жақсы екен. Кеше ғана ауылдан шығарып салған бозбала еді. Бүгін сапта сымдай тартылып, есейіп қалғандай. Біз үшін оның амандық-саулығы, Отан алдында атқарған қызметі маңызға ие. Сондықтан да оның әскери ант қабылдау шарасын көріп, көңіл марқайту үшін арнайы келіп отырмын, – дейді Жетісу облысынан әскерге шақырылған қатардағы Ақылбек Дәрібайдың анасы Дәмелі Сабырханқызы.
Салтанатты жиында әскери музыканың әуенімен қатар-қатар сап түзеп, бір ай бойы үйренген сан алуан әскери қимылдарын көрсеткен сарбаздардың ептілігі мен шеберлігіне жиналған қауым үлкен қошемет білдірді.