Қазіргі таңда еңбек нарығындағы бәсекелестік жоғарылап, жұмыс берушілер тәжірибелі мамандарды көбірек іздейді. Алайда, жаңадан оқу орнын тәмамдаған түлектер үшін жұмысқа орналасу оңай емес. Олардың білімі жеткілікті болғанымен, тәжірибенің аздығы кедергі келтіреді.
«Принт Азия» типографиясының директоры Тимур Салимнің айтуынша, жас мамандарды қолдау – кез келген саланың дамуы үшін маңызды.
«Біз жыл сайын көптеген жас түлектермен кездесеміз. Олардың бойында үлкен ынта, жаңа идеялар бар, бірақ жұмыс тәжірибесінің жоқтығы кейде кедергі болып жатады. Сондықтан біз жас мамандарды қолдап, оларды өндірістік базаға шақырып, тәжірибе жинақтауына мүмкіндік береміз», – дейді ол.
Жұмыс берушілер үшін жас мамандарды жұмысқа алу кейде тәуекелмен байланысты болуы мүмкін. Себебі оларды оқыту, бейімдеу белгілі бір уақыт пен ресурс талап етеді. Бірақ тәжірибе көрсеткендей, жас мамандардың жаңа көзқарасы мен шығармашылық әлеуеті компаниялардың дамуына оң әсер етеді.
Сондықтан, жас түлектерді тек жұмыс тәжірибесінің болмауына қарап бағалау дұрыс емес. Олардың кәсіби дағдыларын дамытуға мүмкіндік беру – болашақта саланың тұрақты дамуына септігін тигізеді. Жас мамандарға берілген әрбір мүмкіндік – жаңа жетістіктерге бастар жол.