Алматыда болашақ мамандарға арналған воркшоп өтті
Алматы қаласындағы «Архитектура, дизайн және инженерия» колледжінде JapJaryk компаниясының ұйымдастыруымен «Свет под контролем» деп аталатын воркшоп өтті. Бұл іс-шара студенттерге электр қалқандары мен жарықтандыру жүйелерін құрастыру бойынша практикалық дағдыларды үйретуге бағытталды. Колледж шаңырағында өткен шараға студенттер, оқытушылар, және сала мамандары қатысты.
Воркшопта JapJaryk компаниясының мамандары заманауи жарықтандыру және электротехника саласындағы инновациялық шешімдерді таныстырып, студенттерге тәжірибелік сабақтар өткізді. Өз кезегінде студенттер электр сызбаларын оқу, монтаждық және принципиалды схемаларды талдау, кабельдік трассаларды жүргізу және таратушы электр қалқандарын орнату бойынша дағдыларды меңгерді. Сонымен қатар, жарықтандыру жүйелерін орнату, баптау, ақауларды анықтау және жою бойынша да қажетті тәжірибе алынды.
Іс-шара барысында Алматы қаласының «Архитектура, дизайн және инженерия» колледжінің директоры Камал Жаманғозов колледждің техникалық білім беру саласындағы маңыздылығын атап өтті. Оның айтуынша, колледж дуалды оқыту жүйесін енгізу арқылы студенттерге теориямен қатар практикалық дағдыларды үйретуді қамтамасыз етеді.
«Біз қазіргі заманғы еңбек нарығына қажетті білікті мамандарды даярлаймыз. Мемлекет басшысының 2025 жылды Жұмысшы кәсіптері жылы деп жариялауы – осы салаға деген сұраныстың артқанын білдіреді. Біз бұл бастаманы қолдаймыз және жүзеге асыруға дайынбыз», – деді колледж директоры.
Бұл воркшоп Алматыдағы техникалық білім мен өндірістің байланысын нығайтуға бағытталған. Қатысушылар теориялық білімдерін тәжірибемен ұштастырып, болашақта нарықта сұранысқа ие маман болуға үлкен қадам жасайды. Жұмысшы мамандықтарының беделін көтеру үшін мұндай бастамалар алдағы уақытта да жалғасады дейді ұйымдастырушылар.
· Тақырыпқа орай
Нұрғали МУСИРМАНКУЛОВ, JapJaryk компаниясының жетекшісі:
Білім сапасын көтеруді көздедік
Қазақстанда электромонтаж саласына бағытталған кешенді оқу орны жоқ. Сондықтан біз осы саланы дамыту үшін жаңа оқыту жүйесін қалыптастырып, колледжбен бірлесіп арнайы кабинет аштық. Студенттерге теорияны визуалды түрде көру және тәжірибеде орындау мүмкіндігін беру арқылы біз олардың шынайы құрылыс нысандарында тәжірибе алуы үшін жағдай жасадық.
Әлихан ӘБДІҚАЛЫҚ, Электромонтаж факультетінің 1-курс студенті:
Білікті маман болуға үлкен мүмкіндік береді
Мен бала кезімнен Никола Тесла сияқты данышпандардың өмірі мен еңбектеріне қызығып өстім. Бұл салаға деген құштарлығым мені электр энергетикасы мамандығын таңдауға жетеледі. Мектепті бітіргеннен кейін осы мамандыққа деген қызығушылығым тек арта түсті және мен ата-анамның қолдауымен осы жолды таңдап, білім алуға қадам бастым. Колледждегі оқытушыларымыз осы мамандықтың тереңдігін түсіндіріп, менің қызығушылығымды арттырып келеді. Олардың сабырлы әрі түсінікті тәсілі мені осы салада жетістікке жетуге деген сенімімді нығайтады.