Алматыда Розыбакиев көшесіндегі Mega Alma-Ata сауда орталығына жарылғыш зат қойылғаны туралы анонимді хабарлама түсіп, келушілер мен қызметкерлер шұғыл эвакуацияланды, деп хабарлайды Аqshamnews.kz тілшісі.
Қалалық полиция департаментінің мәліметінше, ақпарат түскен сәттен бастап барлық жедел қызметтер мен арнайы бөлімшелер оқиға орнына жұмылдырылған. Сауда орталығының аумағы қоршауға алынып, ғимаратты комиссиялық тексеруден өткізу үшін саперлер мен мамандар шақырылған.
Қазіргі уақытта құқық қорғау органдары жалған хабарлама таратқан адамның жеке басын анықтап жатыр. Полиция оның әрекетіне Қазақстан Республикасының заңнамасына сәйкес қылмыстық және әкімшілік жауапкершілік қарастырылатынын ескертті.
Ведомство тұрғындарды сабыр сақтауға, құқық қорғау органдары қызметкерлерінің заңды талаптарын орындауға және қауіпсіздік қызметтерінің нұсқауларын қатаң сақтауға шақырды.