Алматы қаласында өткен жартылай марафон кезінде екі қатысушының қаза табуы – ауыр әрі ерекше назар аударуды қажет ететін жағдай.
Туризм және спорт министрі Ербол Мырзабосынов бұл туралы өзінің Instagram парақшасында жазды, деп хабарлайды aqshamnews.kz.
- Қазіргі уақытта оқиға бойынша толыққанды тексеріс жүргізіліп жатыр. Қатысушылардың денсаулық жағдайы, жарысты ұйымдастыру тәртібі, медициналық қамтамасыз ету деңгейі мен қауіпсіздік регламенті жан-жақты сарапталады,- деді министр.
Сондай-ақ ол сөзінде жергілікті атқарушы органдар өткізетін мұндай шараларға талапты күшейтілетінін атап өтті. Бұқаралық спорт қауіпсіз әрі кәсіби деңгейде ұйымдастырылуы тиіс.
Туризм және спорт министрлігі бұл бағытта нақты ұсыныстар әзірлеп, тиісті құрылымдарға жолдайды.
Қаза болған азаматтардың жақындарына көңіл айтамын!,- деп жазды, Ербол Мырзабосынов.
Еске сала кетейік, кеше Алматыдада өткен жартылай марафон кезінде екі адамның қайтыс болғанын хабарлаған едік.