Ақтөбе облысында пайдаланылмай жатқан ауыл шаруашылығы мақсатындағы 500 мың гектардан астам жер мемлекет меншігіне қайтарылды. Бұл туралы ауыл шаруашылығы мақсатындағы жерлерді тиімді пайдалану мәселелеріне арналған жиын барысында айтылды, деп хабарлайды almaty-akshamy.kz ҚазАқпаратқа сілтеме жасап.
Ауыл шаруашылығы басқармасының мәліметінше, Ақтөбе облысында ауыл шаруашылығы жерлерінің жалпы көлемі 26,5 миллион гектардан астам, оның ішінде жайылымдық жерлер – 24,8 млн гектарды құрайды. Ауыл шаруашылығы айналымына 12,5 млн гектардан астам жер пайдаланылады. Пайдаланылмай жатқан ауыл шаруашылығы жерлерінің 524,8 мың гектары жалға беру шарттарын мерзімінен бұрын бұзу арқылы мемлекеттік жер қорына қайтарылды, оның 39,2 мың гектары – егістік жерлер.
«Ауыл шаруашылығы қорының пайдаланылмай жатқан жерлерін анықтап, мемлекет пайдасына алып қоюмен бірге, оның ұтымды пайдаланылуын қамтамасыз ету қажет», - деді облыс әкімі Оңдасын Оразалин.
Айта кетейік, қазіргі кезде Ақтөбе облысындағы елдімекендердің жалпы жайылымдық көлемі 3,8 млн гектарды құрайды.