Жапонияның Вакаяма префектурасындағы Киси станциясында "Ёнтама" есімді ала мысық вокзалдың толыққанды "бастығы" болып тағайындалды, деп хабарлайды Aqshamnews.kz тілшісі.
Ресми дерекке сәйкес, жаңа "станция бастығын" 7 қаңтарда салтанатты түрде таныстырған. Тағайындау туралы ақпарат вокзалдың ресми сайтында жарияланған. Мысыққа жаңа мәртебесі жазылған арнайы медальон табысталып, ол қарғыбауына тағылған.
Ёнтама бұл қызметте Нитама есімді мысықты алмастырды. Бұрынғы станция "бастығы" былтыр қарашада қайтыс болған. Енді Ёнтаманың міндетіне жолаушыларды қарсы алу, түрлі іс-шараларға қатысу және станциядағы көңіл күйді көтеру кіреді. Сондай-ақ оған екі "орынбасар" таныстырылып, олар тағылымдамадан өтетіні айтылды.
Айта кетейік, Киси станциясында мысықты "бастық" ету дәстүрі 2007 жылы Тамa атты мысықтан басталған. Ол аймаққа туристерді тартып, шағын теміржол тармағын қайта жандандыруға ықпал еткені хабарланған.