Жапонияның солтүстік-шығысында қуаты 7,6 балл болатын жер сілкінісі тіркелді. Жер асты дүмпулері тіпті Токионың орталығында да сезілді, деп хабарлайды Аqshamnews.kz тілшісі Жапонияның метеорологиялық орталығына сілтеме жасап.
Ведомствоның мәліметінше, Хоккайдо, Аомори және Ивате префектураларында биіктігі 3 метрге дейін жететін цунами қаупіне байланысты ескерту жарияланған.
Жер сілкінісінің эпицентрі Аомори жағалауында, шамамен 50 шақырым тереңдікте орналасқан. Аймақта екі өрт оқиғасы тіркелген. Токио мен Син-Аомори қалалары арасындағы жоғары жылдамдықты пойыз қозғалысы уақытша тоқтатылды.
Жапония үкіметі қазір зардап шеккендер туралы ақпаратты нақтылап жатыр. «Томари» атом электр станциясында ешқандай ауытқу анықталмағаны хабарланды.
Бұған дейін, шілде айының аяғында, Жапонияда Ресейдің Камчатка жағалауында болған 7,9 баллдық жер сілкінісінен кейін биіктігі 3 метрге дейін жетуі мүмкін цунами қаупіне байланысты ескерту жарияланған еді.