Фукусима апатына 12 жыл болды.
Жапония жұртшылығы тағы да шеруге шықты, деп хабарлайды Аlmaty-akshamy.kz
Бұл шеру 12 жыл бұрын болған Фукусима апатымен тығыз байланысты. Белсенділер тобы Фукусима-1 атом электр станциясынан радиоактивті суды мұхитқа төгуге қарсы.
12 жыл бұрын 2011 жылы «Фукусима-1» АЭС-де алапат апат болған еді. Бұл Чернобыльден кейін соңғы 25 жылдағы ең ірі апат болып саналады. 9 балдық жер сілкінісінен пайда болған 15 метрлік теңіз толқыны стансаның энергоблоктарын басып қалып, газ құйылған резервуар жарылып, оларды қуат көзінен үзіп тастаған еді. Нәтижесінде реакторларды суыту жүйесі істен шықты. Апатта 20 мыңнан аса адам қаза тапты. Радиацияның кесірінен жарты миллион тұрғын қауіпті аймақтан көшіріліп, мыңдаған үй тұруға жарамсыз болып қалған еді.
Содан бері Жапонияда жылда аза тұту рәсімі өтеді. Сонымен қатар, әр жұма сайын белсенділер тобы наразылық шеруін өткізіп келеді. Олар Фукусима-1 атом электр станциясынан радиоактивті суды мұхитқа төгуге қарсы. Биліктің бұл шешімі экологиялық апатқа әкеледі деген пікірде. Бірақ ел Үкіметі су мұхитқа төгілер алдында сүзіліп, радиоактивті элементтерден тазартылады деген жауап айтуда.
Қазір станция қоймасындағы су мөлшері 1,3 млн тоннаға жетіп, лық толып тұр. Бұл су реакторларды салқындату үшін қолданылады. Шеруге шыққан наразы жұрт "Үкімет шешімін өзгертпесе, апта сайын наразылық шарасын өткіземіз. Радиоактивты суды мұхитқа төгуге қарсымыз. Бұл тек Жапонияға емес, көршілес Қытай мен Кореяға, тіпті бүкіл әлемге әсерін тигізеді", - деп мәлімдеді.