Қазақстандық таеквондошы әлемдік рейтингте көш бастады
Қазақстандық таеквондошы Жансель Дениз жаңартылған әлемдік рейтингте көш басына көтерілді, деп хабарлайды Аlmaty-akshamy.kz ҚазАқпаратқа сілтеме жасап.
Бұл Қазақстан таеквондосы тарихында тұңғыш рет болып отыр.
Әйелдер арасында 73 келіге дейінгі салмақта Дениз 139.81 балмен бірінші орында келеді. Ресейлік Полина Хан (107.94) екінші, оңтүстіккореялық Да Бинь Ли (105.60) үшінші сатыда. Жансель бұрынғы нұсқада төртінші орында еді.
Өз спорттық жолында Дениз 2017 жылы Тайбэйде жазғы универсиадада және 2018 жылы Джакартада (Индонезия) өткен Азия ойындарында күміс медальға қол жеткізді. Сондай-ақ ол – түрлі халықаралық турнирлердің чемпионы һәм жүлдегері.
«Менің арманым алыста болып көрінгенімен, ол орындалды. Мен бүгін шыққан жаңартылған әлемдік рейтингте бірінші орынға ие болдым. Бұл Қазақстан таеквондосы тарихында алғаш рет болып отыр. Мен жалғыз жанашырым – анама алғыс айтқым келеді. Өкінішке қарай, жолымда жеңілістер, сатқындық, алдау да аз болған жоқ. Бірақ, Аллаға шүкір, мен осындамын. Қуанышымды бөліскендердің бәріне рахмет! Сондай-ақ барлық мұсылман қауымын қасиетті Рамазан айының басталуымен құттықтаймын. Дұға-тілектеріңіз қабыл болсын!