Алматыда Жанқош Тұраровтың адвокаты Самат Мамұтов баспасөз мәслхатын өткізді. Баспасөз мәслихатында Самат Мамұтов Әнару Құрманәліге қарсы полицияға арыз бергенін мәлімдеді, деп хабарлайды aqshamnews.kz
Адвокаттың айтуынша, интернет желісінде Әнару Құрманәліге қатысты таралып жатқан бейнематериалдар бойынша полиция басқармасына тексеру жүргізу туралы арыз берілген. Арызданушы адамдардың үстінен оның зорланғаны туралы арыз жазып, ақша алғаны жөніндегі деректер бойынша тексеру жұмыстары жүргізілуде. Бұл деректер нақты дәлелденген жағдайда ресми органдар жауап береді.
Сонымен қатар, Самат Мамұтов интернетте таралып жатқан бейнематериалдар мен өзге де ақпараттарға сәйкес, Әнару Құрманәлінің 2024 жылдың 19 тамызында шамамен сағат 22:00-де мас күйінде Әуезов аудандық полиция басқармасына келіп, Жанқош Тұраровқа арыз бергенін айтты. Сол жерде ол басқа адамдармен жанжалдасып, төбелесіп, жартылай жалаңаштанып, өзін беймарал ұстағаны туралы мәлімет бар. Бұл деректерді тексеру үшін полицияға сұраныс жіберілген, сондай-ақ, полиция аумағындағы бейнебақылау камераларынан жазбалар алынған.
Адвокат Мамұтовтың айтуынша, бұл деректер расталса, Әнару Құрманәліге қатысты сот-психологиялық және наркологиялық сараптама жүргізуге өтініш жасалады. Сонымен қатар, оған қатысты психотропты заттарды қолдану туралы ақпарат түсіп жатқанын да атап өтті.