Дүниежүзілік бокс қауымдастығы барлық салмақ дәрежесі бойынша өз рейтингін жаңартты. Бұл өзгерістен қазақстандық боксшылар да шет қалмады, деп хабарлайды аlmaty-akshamy.kz.
Мәселен, жартылай орта салмақта өнер көрсететін Жанқош Тұраров бір сатыға жоғарылап, алтыншы орынға тұрақтады. Соңғы жекпе-жегін ол өткен жылдың желтоқсан айында Алматыда жапон боксшысына қарсы өткізген болатын. Ол кезде Жанқош төрешілер шешімімен жеңіске жетті.
Супер орта салмақтағы қазақ боксшысы Бек Нұрмағанбет те позициясын жақсартып, оннан тоғызыншы орынға көтерілді. Ол соңғы жекпе-жегін былтыр қазан айында Сауль Альварес – Джермелл Чарло кездесуінің андеркартында өткізген және техникалық нокаутпен жеңіске жеткен еді.
Аса ауыр салмақтағы Иван Дычко бұрынғыша 15-орында, алғашқы жартылай орта салмақтағы Батыр Жүкембаев 11-орында, ал жартылай жеңіл салмақтағы Сұлтан Зауырбек 5-орында қалды.