Қазақстанның Энергетика министрлігі бензин мен дизель отынының шекті бағаларын алып тастау мүмкіндігін қарастыруда. Бұл шешім жанармай бағасын нарықтық үлгіге көшіру қажеттілігімен байланысты. Министрліктің пікірінше, мұндай қадам отын тапшылығын жоюға, саланы жаңғыртуға және ұзақ мерзімді инвестициялар тартуға мүмкіндік береді.
Бүгінде Қазақстанда жанармай бағасы өңірдегі ең төмен деңгейде сақталып отыр. Мысалы, АИ-92 маркалы бензиннің бір литрі Қазақстанда 205 теңге тұрады, ал Ресейде – 288 теңге, Қырғызстанда – 385 теңге, Өзбекстанда – 489 теңге. Дизель отынының құны да айтарлықтай төмен: Қазақстанда бір литрі 295 теңге болса, көршілес елдерде 355-528 теңгеге жетеді.
Энергетика министрлігінің мәлімдеуінше, осындай баға айырмашылығы жанармайдың заңсыз жолмен шекарадан шығарылуына және отын тапшылығына әкеліп отыр. Сонымен қатар бұл мұнай өңдеу зауыттарын жаңғырту үдерісін тежейді.
«Қазақстандағы жанармай бағасы әлемдегі ең төмендердің бірі болып қала береді. Бұл көрші елдермен арада баға айырмашылығын тудырып, отын тапшылығына, саланы жаңғыртудағы қиындықтарға және жанармайды заңсыз экспорттауға себеп болып отыр», – деп атап өтті министрлік өкілдері.
Ұсынылып отырған саясат сұраныс пен ұсыныс арасындағы нарықтық тепе-теңдікті қамтамасыз етуге, отын тапшылығын болдырмауға, жаңа жұмыс орындарын ашуға және ұзақ мерзімді инвестицияларды тартуға бағытталған.
Министрлік өзгерістерді бірден емес, кезең-кезеңімен енгізуді, сондай-ақ әлеуметтік қолдауды ескеруді жоспарлап отыр. Атап айтқанда, ауыл шаруашылығы өндірушілеріне дизель отынына жеңілдетілген және ашық қолжетімділікті қамтамасыз ету уәде етілуде.
Сонымен қатар азаматтарға қолдау көрсету шаралары сақталады деп мәлімделді.