Жаңадан құрылған облыстарға қосымша қаражат бөлінуі мүмкін.
Бұл туралы ҚР Ұлттық экономика министрі Әлібек Қуантыров мәлім етті, деп хабарлайды Almaty-akshamy.kz ҚазАқпаратқа сілтеме жасап.
«Қосымша қаражат бөлу қажет болатыны түсінікті. Жаңадан құрылған әкімдіктерге нысандарды сатып алуға, қосымша штат санына қосымша қаражат керек болады. Осы орайда жергілікті бюджеттен және республикалық бюджеттен бөлінеді», - деді Әлібек Қуантыров Орталық коммуникациялар қызметінде.
Ол үшін тиісті тетіктер қарастырылған, ресурстар да бар. Осыған дейін айтылғандай, 12 млрд теңге жаңадан құрылған облыстардағы әкімдіктер мен басқармалардың жұмысын ұйымдастыруға қарастырылған. Сонымен қатар ол облыс әкімдерінің орынбасарларына қатысты сұраққа жауап берді.
«Аталған өңірлерге тоқталсақ, әр облыс бойынша үш орынбасардан қарастырылған», - деді министр.
Бұдан бұрын хабарланғандай, Әлібек Қуантыров жаңадан құрылған облыстарда инфрақұрылым мен жолдардың сапасына қатысты проблема бар екенін айтты.