Бүгін Алматының Өңірлік коммуникациялар қызметінде жаңа жылдық мереке күндері қарсаңында өрт және қоғамдық қауіпсіздік мәселелеріне арналған брифинг өтті, деп хабарлайды aqshamnews.kz
Пиротехникалық бұйымдарды қауіпсіз пайдалану тақырыбына ерекше назар аударылды. Спикерлер ретінде Алматы қаласы Төтенше жағдайлар департаменті басшысының орынбасары Кәрімжан Рахман Кәрімжанұлы, Мемлекеттік өрт бақылау басқармасының аға инженері Дулат Жандар Елдосұлы, Алматы қаласы ПД әкімшілік полиция басқармасы басшысының орынбасары Тимур Серікұлы және Жедел медициналық көмек қызметінің медициналық бөлімі директорының орынбасары Андрей Ложкин қатысты.
Алматы ТЖД басшысының орынбасары Кәрімжан Рахман пиротехниканы пайдалану көбінесе өрт пен жарақат алуға себеп болатынын атап өтті.
«Жыл сайын Алматыда жаңа жылдық мереке кезінде орта есеппен 11 өрт оқиғасы орын алады, олардың шамамен 18% - ы пиротехникалық бұйымдармен байланысты. Соңғы бес жылда осындай себеппен 57 өрт тіркелді. Біздің басты міндетіміз — осындай жағдайлардың алдын алу және қала тұрғындарын қорғау», - деп атап өтті Кәрімжан Рахман.
Сонымен қатар, өткен жылы 18 адам, оның ішінде 11 бала пиротехниканы дұрыс пайдаланбау салдарынан алған жарақаттарына байланысты медициналық көмекке жүгінді. Жедел жәрдем қызметі директорының орынбасары Андрей Ложкин, ата-аналарды мереке кезінде балаларды мұқият бақылауға шақырды.
«Біз балаларды отшашулар мен петардаларды ұшыруға жол бермеуді ұсынамыз. Бұл қайғылы оқиғаларды болдырмауға көмектеседі», - деді спикер.
ТЖД және полиция өкілдері Алматыда «Пиротехника» операциясы жүргізіліп жатқанын хабарлады. 19 желтоқсандағы жағдай бойынша пиротехникалық өнімдердің 141 қорабы және бірнеше рет атылатын «VIP Салют» отшашуларының 125-і тәркіленді. Пиротехниканы заңсыз сатудың 22 фактісі анықталды. Тәркіленген өнімнің жалпы салмағы 365 кг құрады. Бұл бағыттағы жұмыс жалғасуда.
«Қала аумағында 145 мобильді топ жұмыс істейді. Біздің міндетіміз — қауіпті өнімдерді сатудың алдын алу және әсіресе кәмелетке толмағандар арасында жарақат алу қаупін болдырмау», — деді полиция басшысының орынбасары Тимур Серікұлы.
Сонымен қатар, ТЖ Департаментімен 72 қалалық шырша мен 17 мұз айдыны тексерілді. Меншік иелеріне өрт қауіпсіздігі шараларын күшейту бойынша ұсыныстар берілді.
Спикерлер пиротехникамен қауіпсіз жұмыс істеудің негізгі ережелерін еске салды:
* Өнімдерді тек мамандандырылған дүкендерден сатып алыңыз, қаптаманың тұтастығын және жарамдылық мерзімін тексеріңіз.
* Пиротехниканы жылу мен ылғалдан алыс ұстаңыз.
* Іске қосу кезінде адамдардан, ғимараттардан және ағаштардан 50 метр қашықтықты сақтаңыз.
* Фитильді тұтату кезінде өнімге еңкеймеңіз.
* 16 жасқа дейінгі балаларды өз бетінше тұтатуларына жол бермеңіз.
«Осы қарапайым ережелерді сақтау өрттер мен жарақаттардан аулақ болуға, мерекені қауіпсіз әрі қуанышты етуге көмектеседі», — деп атап өтті Дулат Жандар.
Спикерлер брифинг соңында қайғылы жағдайларды болдырмау үшін Алматы тұрғындарын Жаңа жылды мерекелеуге жауапкершілікпен қарауға шақырды.