Соңғы тәулікте жедел жәрдем қызметінің орталығына халықтан 27 мыңға жуық қоңырау түсті. Оның 17 мыңнан астамы бірінші–үшінші дәрежедегі шұғыл шақырулар санатына кірді, ал төртінші дәрежедегі шақырулар бойынша жедел жәрдем бригадалары 10 мыңнан астам рет шықты.
Ең көп шақырулар Алматы облысынан тіркелді – 3073. Одан кейін Алматы қаласы – 2800 шақыру, Түркістан облысы – 2358 және Астана қаласы – 1942 шақыру.
«Өткен жылдың 11 айында жедел жәрдем бригадалары еліміз бойынша 7,7 миллионнан астам шақыруды қабылдады. Оның ішінде 4,9 миллион шақыру бірінші–үшінші дәрежеге жатқызылды, ал 2,8 миллион шақыру төртінші дәрежеге кіріп, емханалар жанындағы бригадалар қызмет көрсетті. Жалпы шақырулар санының артуына қарамастан, реанимацияның сәтті көрсеткіштері жыл ішінде 7,1 %-ға өсіп, барлық тіркелген жағдайлардың 51,7 %-ын құрады», – деп хабарлады Денсаулық сақтау министрлігі.