Ауруханаға түскен 11 адам үйіне оралды.
Жамбыл облысында орын алған жарылыстан жараланғандардың жартысына жуығы үйлеріне оралды. Жағдайы жақсарған әскерилер госпитальға ауыстырылып, кейбірі үй күтіміне жіберілді, деп хабарлады Almaty-akshamy.kz Almaty.tv сілтеме жасап.
Ал, қаза болған 15 адамның бірі бүгін жер қойнауына тапсырылды. Құтқарушы болып қызмет атқарған 1996 жылы туған Әділет Қанатбекұлын бүкіл Құмжота ауылы ақтық сапарға шығарып салды.
«Ең болмаса үйленіп артынан бала да қалмады. Әке-шешесі ғана қалды. Сол өкінішті. Алдынан жарылқасын», – деді Әділеттің туысы Бибіхан Әлібаева.
Ауылдастары Әділетті батыр ретінде еске алатындарын айтады. Жергілікті билік те, ерлердің есімі ұмытылмайды деп отыр. Қазіргі уақытта қаза болғандардың отбасына өтемақы беру мәселесін қарастырып жатқан көрінеді. Яғни республикалық бюджеттен 10 млн, жергілікті қазынадан 5 млн, оған қосымша несиелері болса өтеуге көмек қолын созбақ.