Жамбыл облысында дауыл мен қалың қар тұрғындарды электрмен жабдықтауға және көлік жұмысына кедергі келтірді, деп хабарлайды аlmaty-akshamy.kz.
Жамбыл облысы әкімдігі баспасөз қызметінің хабарлауынша, күшті жел мен қар аралас жаңбыр салдарынан Шу ауданында электр желісі үзіліп, тіреуіштер құлаған. Облыстың 4 ауданындағы 32 елдімекенде 8 882 абонент жылусыз қалды.
ТЖ себебінен Шу-Отар аумағында әрқайсысына орта есеппен 500-700 адам мінген 11 жолаушылар пойызы тоқтап тұр. 12 жүк пойызы да сапарын жалғастыра алмай қалды. Жел екпіні секундына 45 метрге жетеді.
“Қазгидромет” РМҚ жақын күндері қалың қар жауып, жел 30 м/с дейін күшейеді деп болжап отыр.
Әкімдік жергілікті тұрғындарды қазіргі жағдайға байланысты ресми дереккөздерің ақпаратына ғана сенуге шақырды.
Өңірде ауа райына байланысты жергілікті ТЖ жарияланды.
Бұған дейін Жамбыл облысында ауа райы күрт нашарлап, ақ түтек боран соғып, жолдың дұрыс көрінбеуіне байланысты «Шу-Қайнар» тас жолының 0-56 шақырымы, «Қордай-Қайнар» тас жолының» 214-2358 шақырым бөлігі автокөліктің барлық түрі үшін жабылғаны хабарланған.
Сондай-ақ ауа райының қолайсыз жағдайына байланысты 500-ден астам жүк көлігі тас жолдардың бойында тұрғанын жазған болатынбыз.
ІІМ баспасөз қызметінің мәліметінше, жамбылдық полицейлер автожолдардағы жағдай дұрысталып, қауіп сейілгенше азаматтарға жан-жақты көмек көрсетіп жатыр.