Алматы қаласының Антитеррористік комиссиясы аппараты мемлекеттік қызметкерлерінің лаңкестікке қарсы сауаттылығын арттыру мақсатында Департамент экономикалық тергеу қызметкерлерімен дәріс өткізді.
Оқыту іс-шарасын өткізудің өзектілігі құқық қорғау органдары ғимараттарына «бомба қойылғаны» туралы жалған қоңыраулар мен хабарламалардың көбеюіне байланысты, деп хабарлайды aqshamnews.kz.
Дәріс барысында Алматы қаласы Полиция департаментінің экстремизмге қарсы іс-қимыл басқармасы мен күзет қызметін бақылау бөлімінің қызметкерлері баяндама жасады.
Қатысушыларға «Лаңкестік қатерлер туындаған жағдайда әрекет ету алгоритмі» жан-жақты түсіндірілді. Сонымен қатар, лаңкестік қауіптер туралы хабардарлықты арттыруға бағытталған әңгіме жүргізілді. Шетелдік тәжірибе негізінде құқық қорғау органдарына жасалған лаңкестік әрекеттер туралы мысалдар келтірілді.
Дәріс барысында қатысушылар түрлі лаңкестік жағдайлар кезіндегі қызметкерлердің іс-қимылдарына қатысты сұрақтар қойды.
Өткізілген іс-шараның форматы оң бағаланып, Департамент экономикалық тергеу қызметкерлерінің лаңкестікке қарсы сауаттылығын арттыруға мүмкіндік берді.