Сыбайлас жемқорлыққа қарсы іс-қимыл агенттігі жалған дипломмен жұмыс ісетеген жүздеген бапкерді анықтады.
Агенттіктің ресми өкілі Данияр Бигайдаровтың айтуынша, былтыр тренерлік-оқытушылық және спорттық қызметпен айналысқан 278 адамның жалған диплом пайдаланғаны анықталды, деп хабарлайды aqshamnews.kz
Соның ішінде 9 басшы, 248 жаттықтырушы және 21 басқа қызметкер бар. Ондай адамдардың басым бөлігі бес облыста әшкереленді. Олар:
• Түркістан облысы – 44 адам;
• Атырау облысы – 30 адам;
• Алматы облысы – 26 адам;
• Жамбыл облысы – 22 адам;
• Ақмола облысы – 20 адам;
"Мысалы, Астана қаласында олимпиадалық резервтің балалар-жасөспірімдер спорт мектебінің басшыларының бірі жоғары білім туралы жалған дипломмен жұмыс істеген. Оның оқу барысында басқа спорт ұйымында нұсқаушы қызметін атқарғаны анықталды", - деді Бигайдаров бүгінгі брифингте.
Ал Маңғыстау облысында олимпиадалық резервтің облыстық мамандандырылған балалар-жасөспірімдер спорт мектебінде директор орынбасары жалған дипломмен ұсталды. Қазіргі кезде барлық материал ішкі істер органдарына берілді. Соның аясында тергеу шаралары басталды.
"Қабылданған шаралар аясында 250 адаммен еңбек келісімшарттары бұзылды. Қалғандары бойынша жұмыстан босату мәселесі тергеу нәтижелері бойынша шешіледі", - деп атап көрсетті агенттіктің ресми өкілі.