Павлодар облысында жалған ақпарат берген жасөспірімнің ата-анасы жауапқа тартылды, деп хабарлайды aqshamnews.kz
«102» арнасына қобалжыған дауыспен хабарласқан қыз бірнеше минут бұрын 13 жастағы бауыры қоңырау шалып, «белгісіз адамдар оны қара джиппен алып кетіп, ұрып-соғып жатыр» деп айтқан. Осыдан кейін оның телефоны өшіп қалған.
Жасөспірімнің туыстары оның жаттығуға баруы керек екенін айтқан. Құқық қорғау органдары жағдайдың күрделілігін түсініп, дереу Атамекен кентіне барды. Тез арада іздестіру шаралары ұйымдастырылып, туыстарымен, көршілерімен және кент тұрғындарымен сұхбат жүргізілді.
Біраз уақыттан кейін кәмелетке толмаған бала үйге аула арқылы кіріп келгенде, полиция мен ата-аналарды аң-таң қалдырды. Жасөспірімнің айтуынша, ол ішінің пысып, ата-анасы мен әпкесін алдау үшін өзін «ұрлады» деген жалған ақпарат ойлап тапқан.
Оқиғаға байланысты жасөспірімнің ата-анасына 30 АЕК көлемінде айыппұл салынды. Полиция департаментінің өкілі:
– Бұл оқиға мен жаза жасөспірім мен оның отбасы үшін маңызды сабақ болады деп үміттенеміз. Мұндай жалған қоңыраулар тек қорқыныш тудырып қана қоймай, қызметтердің жұмысын қиындатып, шынайы көмек қажет ететін адамдарға кедергі келтіруі мүмкін, – деп атап өтті.
Құқық қорғау органдары азаматтарды жалған қоңырау шалып, қызметтерді алдаудан сақтануға шақырды. Мұндай әзілдер жедел жәрдем ресурстарына қауіп төндіріп, қоғамдық тәртіпті сақтауға кері әсерін тигізеді. Заң бұзушылықтарға ешкімнің көз жұмуына жол берілмейді, себебі «заң және тәртіп» қағидасы азаматтардың қауіпсіздігі үшін басты негіз болып табылады.