Жаяу жүргіншілердің жол қозғалысы ережелерін бұзып, белгіленбеген орындарда такси немесе көлік тоқтатуға тырысуы – ұзақ уақыттан бері жалғасып келе жатқан мәселе. Мұндай заң бұзушылықтар олардың қауіпсіздігіне ғана емес, сондай-ақ жүргізушілер үшін де өзіндік кері әсерін тигізетінін жасырмаймыз. Көлік жүргізушілері жаяу жүргіншілерді басып кетпеу үшін маневр жасауға мәжбүр болады. Әрине, бұл жолда келе жатқан өзге көлік жүргізушілері үшін қатер төндіретіні анық, деп хабарлайды aqshamnews.kz.
Жаяу жүргіншілердің ережені бұзуы
Алматы қалалық полиция департаментінің мәліметінше, жаяу жүргіншілер арнайы жабдықталған орындарда немесе тротуарларда көлік күтуі керек. Жолға шығып, такси тоқтату - тікелей Жол қозғалысы ережелерін бұзу. Бұл үшін Әкімшілік құқық бұзушылықтар туралы кодекстің 615-бабы бойынша жаза қолданылады. Жаяу жүргіншілерге 2 айлық есептік көрсеткіш (АЕК) көлемінде айыппұл салынады, ал қайталанған жағдайда айыппұл көлемі 10 АЕК-ке дейін өседі.
Жүргізушілердің жауапкершілігі
Такси тоқтатып тұрған жүргіншілермен саудаласатын жүргізушілер де жауапкершіліктен құтыла алмайды. Көлік құралдарын тоқтату және тұрақ ережелерін бұзу бойынша ӘҚБтК 597-бабына сәйкес, жолға кедергі келтірген жүргізушілерге 10 АЕК көлемінде айыппұл салынады.
Жүргізушілердің жаяу жүргіншіні қағып кету жағдайы
Егер жүргізуші ереже бұзған жаяу жүргіншіні қағып кетсе де, заң көбінесе жаяу жүргінші жағында болады. Жүргізуші жылдамдықты сақтап, барлық ережелерді орындаса да, апатты болдырмауға міндетті. Егер жаяу жүргінші зардап шексе немесе қайтыс болса, жүргізуші Қылмыстық кодекстің 345 немесе 346-баптары бойынша қылмыстық жауапкершілікке тартылуы мүмкін.
Сондықтан өзгеге кесіріңіз тимесін десеңіз жол ережесін сақтағаныңыз абзал.