Израиль әскери күштері Ирандағы әскери нысандарға «дәл соққы» жасағанын мәлімдеді, деп хабарлайды BBC News.
ЦАХАЛ түнгі сағат 2 шамасында «Иран режимінің Израильге қарсы тұрақты шабуылдарына» жауап ретінде Ирандағы әскери нысандарға дәл соққылар жасалғанын жариялады.
Израильдің Иранға берген бұл жауабы Тегеранның 1 қазанда Израильге жаппай шабуыл жасап, 200-ге жуық баллистикалық зымыран атуынан кейін жасалған жоспарлы әрекет еді. Бұл шабуыл Израильдің Бейруттегі «Хезболла» тобының штаб-пәтеріне жасаған соққысынан қаза тапқан «Хезболла» жетекшісі Хасан Насралланың өліміне жауап ретінде болды.
Израильдің жауап шабуылының толық ауқымы әлі анықталмағанымен, Израильдің қоғамдық телеарнасы ондаған жойғыш ұшақ Иранның әскери нысандарына соққы жасағанын хабарлады, деп жазды Reuters.
Иранның Fars ақпарат агенттігі Тегеранның батысы мен оңтүстік-батысындағы бірнеше әскери базаның Израильдің шабуылына ұшырағанын растады.
NBC News және ABC News хабарлауынша, Израильдің шабуылдарына энергетикалық инфрақұрылым немесе ядролық нысандар кірмеген, деп мәлімдеді израильдік шенеунік.
Израильдің 12 телеарнасының мәліметіне сәйкес, соққылардың негізгі нысанасы – Иранның қорғаныс өнеркәсібінің орталық әскери нысандары, соның ішінде зымыран зауыттары, ұшқышсыз ұшақтарды әзірлеу және өндіру нысандары, сондай-ақ баллистикалық зымырандарды ұшыру базалары болды.
Иранның мемлекеттік телеарнасы Тегеран маңында «күшті жарылыс» болғанын хабарлады.