Алматыдағы №176 мектеп-гимназиясында оқушыларға арналған мотивациялық кездесу өтті. "Еңбек - еңсе көтереді" жобасы аясында өткен мағыналы кездесудің бас кейіпкері IT саласының үздігі Айболат Құлтай болды.
Өз еңбегімен еңсе көтерген білікті маманмен кездесуге мектептің 10-11 сынып оқушылары қатысты. Мамандық таңдау алдында тұрған оқушылар үшін арнайы ұйымдастырылған шараны Алматы қаласы Қоғамдық даму басқармасы Қоғамдық даму орталығының қолдауымен ұйымдастырған болатын.
Кездесу барысында IT маманы Айболат Құлтай өзінің мамандық таңдау кезіндегі және студенттік кездегі тәжірибелерімен бөлісе отырып, таңдаған мамандығының өміріне қалай әсер еткенін баяндады. Әрі өзінің IT жобаларының жасалу барысын, олардың қызметі мен нәтижелерін, алдағы жоба-жоспарларымен бөлісті.
"Кездесуде өз саламның төңірегінде даму тенденцияларын жас жеткіншектерге түсіндірсем деймін. IT жобаларымды таныстыра отырып, болашақ маман иелерінің бұл салаға деген түсінігін, қызығушылығын арттыруды мақсат етіп келдім. Қазір бұл сала бойынша Қазақстан да әлем көшінен шеткері қалып жатқан жоқ, тіпті кейбір еуропалық елдерден де алда кеткен жақтарымыз бар. Жалпы, бұл сала бойынша елімізде мүмкіндік өте жоғары. Бұл туралы оқушылар білсе және болашақ сұранысы бар осы салаға көңіл аударса деген үмітім бар," – дейді Айболат Құлтай.
Аталған салада еңбек етіп келе жатқан азамат бұған дейін елге белгілі болған Aqyl Battle мобильді интеллектуалды ойыны мен @sez.app қосымшасының авторы. Әрі Thousand IT компаниясының негізін қалаушы.
"Әлемде де, елімізде де IT мамандарына деген тапшылық байқалады. Елімізде 2025 жылдың өзінде 100 мың IT маманына деген тапшылық болатыны бұған дейін Мемлекет басшысы да атап өткені бар. Сондықтан мамандық таңдау алдындағы оқушылардың бұл салаға бет бұруы, қызығушылық танытуы маңызды деп ойлаймын," – дейді сала маманы.
Жоғары сынып оқушылары өздеріне қатысты бұл кездесуге қызығушылық танытты. Кейіпкермен сұрақ-жауап барысында оқушылардың осы салаға деген ынтасы жоғары екені де байқалды.
"Еңбек - еңсе көтереді" әлеуметтік жобасы аясында мұндай кездесулер бұған дейін де қаладағы бірқатар мектепте өткізілген. Ұйымдастырушы ретінде "Жауһар" қоғамдық қорының жетекшісі Нұрислам Исмайыл жобаның басты мәні мектеп бітіру алдындағы оқушылардың заманауи сын-қатерлерге бейімділігін арттырып, болашақта табысты тұлғаға айналуына ықпал ету деп санайды.