Пәкістан астанасында автокөлік жарылып, кемінде 12 адам қаза тапты, - деп хабарлайды Aqshamnews.kz India Today дерегіне сүйеніп.
Пәкістан астанасы Исламабадта көлік жарылысы салдарынан кемінде 12 адам көз жұмып, 20-дан астам адам жараланды. Билік пен полиция бұл оқиғаны теракт ретінде қарастырып отыр.
Пәкістандық БАҚ мәліметінше, жарылыс халық көп жиналатын уақытта сот ғимаратының маңында, сол жерде тұрған автокөлікте болған. Дүмпуінің қатты болғаны соншалық, жарылыс дыбысы 6 шақырымға дейін естілген. Зардап шеккендердің басым бөлігі адвокаттар мен сот қызметкерлері.
Алдын ала болжам бойынша, жарылысты жанкешті-террорист жасаған болуы мүмкін.
Пәкістан Президенті Асиф Али Зардари бұл шабуылды қатаң айыптап, қаза тапқандардың жақындарына көңіл айтты.