Ауаның ластануынан Иран экономикасы жыл сайын 12 млрд доллар шығын көріп келеді.
Ал өткен жылы (2024 ж.) парсы елінде лас ауаның кесірінен 50 мыңға тарта адам көз жұмған, деп хабарлайды aqshamnews.kz.
Бұл жайында islam.kz порталы өз кезегінде Иранның денсаулық сақтау министрі Мұхаммедреза Зафарған мәлімдемесінде келтірілген дерекке жөн сілтеген Anadolu ақпарат агенттігіне сілтеме жасай отырып мәлім етеді.
Министр Таза ауа күніне арналған ұлттық жиналыста мінберден сөз алып, жыл сайын елдегі өлім-жітімнің 12,56%-ы ауаның ластануымен байланысты орын алатынын жасырмады. Халықаралық стандартқа сәйкес ауаның бір текше метрінде зиянды бөлшектердің мөлшері 5 микрограмнан асатын болса, яғни, шоғырланса, бұл деңгей ауаның ластанғанын білдіретін көрсеткіш. Ал Иран аумағындағы бұл көрсеткіш 12 микрограмға жеткен.
Иран халқы жылдың 247 күнін ластанған ауамен тыныстап өткізеді екен. Ал ел астанасы – Теһран қаласының тұрғындары жылына 353 күн ластанған ауамен тыныстауға тура келеді. Бұған ең алдымен ауа айналымы үшін Теһранның жағрафиялық тұрғыдан қолайсыз аймақта орналасқандығы себеп болып отыр. Бұдан бөлек, санкцияға байланысты тозығы жеткен автокөліктер де ауаның ластануына көп үлес қосып отыр.