Орталық коммуникациялар қызметінің алаңында Instagram және Facebook желілерінде қазақстандық музыкалық контенттің неге қолжетімсіз болғаны талқыланды.
Бұл тақырыпқа қатысты ресми мәлімдемені ҚР Әділет министрлігі Зияткерлік меншік құқығы комитетінің төрайымы Шолпан Әбдіреева жасады, деп хабарлайды aqshamnews.kz El.kz ақпарат агенттігіне сілтеме жасап.
Оның айтуынша, әлеуметтік желілерде музыкалық шығармаларды заңды түрде пайдалану үшін автордың немесе құқық иесінің келісімі қажет.
Авторлық құқық саласындағы ұлттық заңнама мен халықаралық конвенциялар музыкалық туындыларды, әсіресе интернет пен әлеуметтік желіде пайдалану үшін автордың немесе құқық иесінің рұқсаты болуы керектігін нақты белгілейді. Әрине, заңнамада кейбір жағдайларда автордың келісімінсіз, сыйақы төлемей пайдалануға рұқсат беретін еркін пайдалану тәртібі бар. Бірақ бұл жағдайлар нақты әрі шектеулі түрде реттелген, – деді Әбдіреева.
Айта кетейік, 2023 жылдың соңында Meta компаниясы мен қазақстандық құқықты басқару ұйымдары арасындағы келісім мерзімі аяқталып, жаңартылмаған болатын. Соның салдарынан Instagram және Facebook платформаларынан қазақ әндері уақытша алынып тасталды.
Қазіргі уақытта мәселе шешімін тапты – жаңа келісімге қол қойылып, қазақстандық музыка платформаларда қайта қолжетімді болмақ. Келісімшарт екі жыл мерзімге жасалған.