Алмалы ауданындағы инженерлік желілердің дамуы мен жақсаруына бағытталған маңызды жұмыстар 2024 жылы басталып, үлкен жетістіктерге жетті. Осы бағытта аудан тұрғындарын тұрақты сумен және кәріз жүйелерімен қамтамасыз ету мақсатында айтарлықтай жұмыстар атқарылғаны жайында Алмалы ауданының тұрғындарымен кездесуінде қала әкімі Ерболат Досаев айтты, деп хабарлайды aqshamnews.kz
- 2024 жылы Алмалы ауданының 21 көшесінде 8,8 км инженерлік желі салынды. Бұл жұмыстардың жалпы құны 1,1 млрд теңгені құрады. Бұл желілер аудан тұрғындарын сапалы сумен және кәріз жүйелерімен тұрақты түрде қамтамасыз етуге мүмкіндік берді. Сонымен қатар, 2024 жылдың қараша айында Төле би көшесіндегі сорғы станциясының реконструкциясы аяқталды. Қазіргі таңда станция 4 көпқабатты тұрғын үйдің 1 500 абонентіне тұрақты сумен жабдықтауды қамтамасыз етеді.
2025 жылдың соңына дейін Алмалы ауданында тағы 23 көшеде 13,8 км инженерлік желі салынуы жоспарланған. Бұл мақсаттарға арналған қаржы 6,2 млрд теңгені құрайды. Бұл жұмыстар ауданның инфрақұрылымын одан әрі дамытуға, тұрғындардың өмір сүру сапасын арттыруға мүмкіндік береді, - деді мегополис басшысы Е.Досаев
Өткен жылы инженерлік желілердің тағы бір маңызды саласы – жылу жүйелерінің реконструкциясы бойынша ауқымды жұмыстар жүргізілді. Жылу желілерін модернизациялау жұмыстарына жалпы сомасы 1,5 млрд теңге бөлінді. Нәтижесінде 2,7 км жылу желісі жаңартылып, осы жұмыстардың арқасында жылыту жүйесі айтарлықтай жақсарды.
2025 жылдың мамыр айында жылыту маусымы аяқталғаннан кейін, тағы 12,2 км жылумен жабдықтау желілерін реконструкциялау бойынша 30 жобаның іске асырылуы басталады. Бұл жобалардың жалпы құны 6,4 млрд теңгені құрайды. Жобалардың толық аяқталу мерзімі 2025 жылдың күз айына жоспарланған. Бұл жұмыстар жылыту жүйелерінің тиімділігін арттырып, қала тұрғындарының жылыту маусымында тұрақты және сапалы қызмет алуын қамтамасыз етеді.
Инженерлік желілерді модернизациялау жұмыстарын жалғастыру, әсіресе су, кәріз және жылу жүйелерін жаңарту, Алмалы ауданындағы тұрғындардың өмір сүру сапасын жақсарту үшін маңызды қадам болып табылады. Бұл жобалар ауданның инфрақұрылымын нығайтып, болашақта әлеуметтік және экономикалық дамудың негізін қалауға мүмкіндік береді.